المعدل الطبيعي مش خط أحمر و مش طبيعي – إزاي تتطمن و تفهم نتيجة التحليل بنفسك؟

١) السن:

في تحاليل معدلها الطبيعي في الأطفال بيختلف عن الكبار البالغين.

زي مثلاً تحليل إسمه (Alkaline Phosphatase ALP)، ده إنزيم موجود في خلايا الكبد و العظام.

من الطبيعي جداً إن مستوياته تكون عاليه عند الأطفال عشان عظامهم بتكبر. إنما لو مستوياته عاليه عند الكبار البالغين فده معناه إن في مشكله في العظام أو الكبد.

عشان كده المعدل المكتوب في تقرير طفل هيكون مختلف عن المعدل المكتوب في تقرير شخص بالغ.

٢) الجنس:

هرمونات الذكوره من الطبيعي جداً إنها تكون عاليه عند الراجل لأنها مسؤوله عن صفاته الذكوريه. و من الطبيعي جداً إنها تكون قليله عند المرأه.

عشان كده المعدل المكتوب في تقرير راجل هيكون مختلف عن المعدل المكتوب في تقرير إمرأه.

٣) الحمل:

تحليل زي الهيموجلوبين من الطبيعي جداً إنه يكون عند السيده الحامل أقل من المعدل الطبيعي عند سيده مش حامل، لأن الحامل عندها بيبي بياكل من أكلها و بياخد من دمها. فمن الطبيعي إن الهيموجلوبين يقل شويه في فترة الحمل ، لكن طبعا في حدود لو قل عنها بيبقى في خطر على البيبي و الأم.

عشان كده المعدل المكتوب في تقرير سيده حامل هيكون مختلف عن المعدل المكتوب في تقرير سيده مش حامل.

٤) المعمل:

المعدل الطبيعي بيختلف بين المعامل و بعضها لأن كل معمل بيستخدم كيماويات و أجهزه مختلفة عن المعمل التاني.

عشان كده ما ينفعش تقارن نتيجة معمل بالمعدل بتاع معمل تاني.

نتيجتك تقارنها بالمعدل بتاع المعمل اللي عملت فيه، لأن ممكن نتيجتك تكون طبيعيه و لما تقارنها بالمعدل بتاع معمل تاني تلاقي إن عندك مشكله، و ساعتها تتلخبط و توهم نفسك و تزعل على حاجه مش عندك أصلاً.

٥) الجنسية أو العِرق:

يعني المعدل بتاع الشعب المصري بيختلف عن المعدل بتاع الشعب الأمريكي، لأن كل مجتمع منهم له عاداته الغذائيه و إسلوب حياته و جيناته الوراثيه و تركيبته الجسمانيه إللي بتختلف من شعب لشعب.

لكن ده مايمنعش إن في معدلات طبيعيه ثابته في أي مكان في العالم، زي معدلات السكر و معدلات الدهون في الدم.

المعدلات دي ثابته و بتوصيه من منظمات عالميه و ماينفعش تتغير من بلد لبلد أو من معمل لمعمل.

نفهم من كل الكلام ده إن لما تحب تقرأ نتيجة تحليل تبقى عينك على حاجتين:

١) النتيجه

٢) المعدل الطبيعي اللي في التقرير بتاعك انت

و مالكش دعوه بالمعدل الطبيعي بتاع إبنك أو بنتك أو صاحبك ، عينك على تقريرك إنت و بس عشان ما تلخبطش نفسك.

طب أهم سؤال بقى اللي ما جاوبناش عليه لحد دلوقتي

لو نتيجتي أعلى أو أقل من المعدل الطبيعي يبقى كده عندي مرض؟

جاوبنا قبل كده و قلنا لأ بس ما شرحناش إزاي ، نشرح بقى إزاي

لو تفتكر إحنا قلنا إن المعدل الطبيعي اللي بيتحسب هو عباره عن معدل نتيجة ٩٥ % من الناس السليمه، يعني معنى كده إن في ٥ % طبيعيين و ما عندهمش مرض بس نتيجتهم كانت خارج المعدل الطبيعي، يعني إيه برده ؟!!

يعني في ناس نادره و عددها قليل بيكون المعدل الطبيعي بتاعها بيختلف عن المعدل الطبيعي بتاع باقي البشر.

يعني مثلا لو في تحليل المعدل الطبيعي بتاعه لحد ١٠٠، و شخص عمل التحليل و نتيجته طلعت ١٠٥ ، ما ينفعش نقول له انت حياتك في خطر و تحليلك أعلى من الطبيعي و عندك مرض.

لأ طبعاً الأمور مش بتتحسب كده، المعدل الطبيعي مش خط أحمر، لأن الشخص ده ممكن يكون من الناس النادره اللي الطبيعي عندها أعلى من الطبيعي بتاع معظم البشر.

و عشان المعدل الطبيعي مش خط أحمر، فهو أصلاً اسمه مش (المعدل الطبيعي) لأنه مش طبيعي.

الإسم العلمي الصح هو (المعدل المرجعي)، يعني مجرد رقم بنرجع ليه و نستدل و نقيس بيه، لكنه مش حكم فاصل.

كمان ما ينفعش نشخص المرض بالإعتماد على نتيجة تحليل واحده، يعني مثلاً عشان نشخص حد إنه مصاب بمرض السكر لازم نعيد التحليل مرتين، و ده مش كلامي أنا، ده توصيات الجمعيه الأمريكيه لمرضى السكر، لأن ببساطه ممكن يكون إرتفاع لحظي و يرجع للطبيعي تاني.

لو بصيت في صورة التقرير اللي تحت هتلاحظ إن جنب كلمة Diabetic مكتوب must be confirmed. يعني لو بتعمل التحليل لأول مره و النتيجه بتقول إن عندك سكر، يبقى لازم تعيد التحليل قبل ما نشخصك و نقول ان عندك سكر.