معمل البيت

نتيجة التحليل – إزاي تفهم نتيجة التحليل؟! و تتطمن قبل ما تروح للدكتور

لما بتسأل اللي موجود في المعمل على نتيجة التحليل و تقول له خير طمني إيه الأخبار؟ بتلاقي الرد المستفز ده >>> “مش هينفع نطمن حضرتك على نتيجة التحليل، إن شاء الله لما تروح للدكتور هيبقى يطمنك، سعداء بخدمة حضرتك يافندم.”

أكيد حصل معاك الموقف ده قبل كده و انت بتستلم نتيجة التحليل من المعمل، و طبعاً ساعتها بتكون قلقان و عايز تطمن و تعرف طلع عندك إيه.

صحيح كل واحد له تخصصه و أخصائي التحاليل الطبيه مهما كان شاطر ما يقدرش يشخص المرض، لأن اللي بيشخص المرض هو الطبيب المعالج، و مش أي طبيب كمان ده لازم يكون طبيب متخصص في الحاله اللي بيكشف عليها.

لكن مش معنى كده إن الواحد لما يسأل اللي في المعمل على نتيجة التحليل ما يلاقيش رد أو يقول له الدكتور هيبقى يطمنك.

و لو حاولت تفتح التقرير و تفهمه مع نفسك بتلاقي قدامك كلام إنجليزي و أرقام كتيير تلخبط و مش مفهومه، ساعتها بتتضايق و تفضل قلقان و مهموم لحد ميعاد الدكتور، و تسأل نفسك يا ترى هيطلع عندي إيه ؟ 

عشان كده في معمل البيت قلت لازم نقدم لك ٣ حاجات مهمين جداً

١) هنطمنك على نتيجتك (في حدود تخصصنا طبعاً) لحد ما تروح للدكتور و يطمنك و يوضحلك الصورة كامله.

٢) هنعرفك إزاي تقري التقرير و تفهمي نتيجة التحليل لوحدك. 

٣) عملنا لك في معمل البيت تقرير مختلف عن تقارير باقي المعامل، هيسهل عليك انك تقرأ النتيجه و تعرف انهي تحليل اللي فيه مشكله.

كمل للآخر و هتفهم أكتر .

إزاي تفهم نتيجة التحليل لوحدك ؟

١) الأول لازم تعرف التقرير بيتكون من إيه، أو بمعنى تاني إيه العناصر اللي مكتوبه فيه، و ده اللي هنتكلم عليه دلوقتي.

٢) بعد كده إزاي تفهم نتيجة كل تحليل لوحده، و ده اللي هنحاول نشرحه بالتفصيل و بشكل سهل و بسيط في المرات اللي جايه.

يعني مثلاً ..

  • مره نتكلم عن مرض السكري و تحاليله.
  • مره نتكلم عن مرض الأنيميا و تحاليله.
  • مره نتكلم عن وظائف الكبد.
  • مره نتكلم عن وظائف الكلى، و هكذا.

نتكلم دلوقتي عن التقرير بيتكون من إيه ؟ و إيه هي العناصر اللي مكتوبه فيه ؟

عناصر تقرير التحاليل الطبية

١) أول حاجه لازم تعملها بعد ما تمسك التقرير إنك تشوف جزء البيانات اللي بيكون موجود فوق في أول التقرير.

لازم تتأكد إن البيانات اللي على التحليل هي بياناتك إنت.

راجع الإسم رباعي و السن عشان تتأكد إن النتيجه اللي إستلمتها هي نتيجتك انت مش نتيجة حد تاني.

٢) بعد كده هتلاقي في كل صفحه من فوق عنوان، العنوان ده بيكون حاجه من اتنين:

  • إسم التحليل ، لو كانت الصفحه فيها تحليل واحد بس بياناته كتير زي صورة الدم Complete Blood Picture / Complete Blood Count
  • أو إسم لمجموعة تحاليل شبه بعض زي تحاليل الهرمونات Hormones Profile

٣) بعد كده بتلاقي جدول مقسم لمجموعة خانات :

Test:

و دي فيها إسم التحليل ، زي مثلا سكر صايم Fasting Blood Sugar

Result:

و دي بيكون فيها النتيجة، زي مثلا 150

Unit:

و دي وحدة القياس، يعني إيه بقى؟

بص يا سيدي، مش انت لما بتشتري لحمه من السوق بتقول أنا إشتريت كيلو لحمه. أهو الكيلو ده إسمه وحدة قياس، و كل حاجه بنقيسها في الدم ليها وحدة قياس.

فمثلاً لما بنقيس مستوى السكر في الدم بنقول النتيجة 100 mg/dL ، يعني وحدة القياس هنا mg/dL

و دي ماتشغلش بالك بيها لأنها حاجات فنيه، ما لناش دعوه يا موهي 😀

Flag:

و دي حاجه مميزه في تقرير معمل البيت ، الخانه دي بيكون فيها علامات بتوضحلك إذا كان التحليل نسبته :

  • عاليه
  • قليله
  • حرجه، (حالة حرجه يعني تستدعي تدخل الطبيب المعالج أو المستشفى فوراً).

يعني مثلا لو تحليل هيموجلوبين (بتاع الأنيميا) كانت نتيجته ٦ ، فده رقم قليل جداً و كمان معناه إن الحالة حرجه و لازم نقل دم سريع قبل ما المريض يدخل في غيبوبة.

و لو النتيجه طبيعيه هتلاقي الخانه فاضيه .

و ده طبعاً بيسهل عليك قراية التقرير لأنك هتشوف بس التحاليل اللي عندها علامه و الباقي هيبقى طبيعي.

Reference Interval:

في الخانه دي هتلاقي المعدل الطبيعي، و ده نقدر نقول عليه المسطره اللي بنقيس عليها النتيجه.

لو مثلا نتيجة السكر في الدم كانت 150 mg/dL ، ياترى دي حاجه كويسه ولا وحشه؟!

يا ترى كده انا طبيعي ولا يبقى عندي سكر ؟

اللي يجاوبك ع السؤال ده هو المعدل الطبيعي اللي هنقارن بيه.

يعني مثلاً لو بنتكلم على سكر صايم و النتيجه كانت 150 mg/dL ، و المعدل الطبيعي مكتوب أقل من 100 mg/dL ، يبقى معنى كده إن النتيجه أعلى من المعدل الطبيعي.

و ده شكل تقرير معمل البيت عشان تقدر تتخيل اللي كنا بنتكلم فيه من شويه، و ركز على خانة العلامات اللي بتقولك التحليل عالي و لا قليل.

طب السؤال هنا بقى ..

هل معنى إن نتيجتي أعلى أو أقل من المعدل الطبيعي يبقى انا كده في خطر أو عندي مرض؟

 

الإجابه لأ طبعاً ..

طب إزاااي يا عم الحاج؟!! … ما تلخبطنيش انا مش ناقص لخبطه 

إزاي دي بقى عشان أجاوبك عليها عايزه مقال تاني لوحده نتكلم فيه مع بعض عن :

  • المعدل الطبيعي
  • إزاي بيتحدد  
  • إمتى أقول إن عندك مشكله أو إصابه بالمرض أو لأ

تابع المقال ده 

“المعدل الطبيعي مش خط أحمر و مش طبيعي – إزاي تتطمن و تفهم نتيجة التحليل”

لو عجبك المقال ده و استفدت منه ..

إعمل مشاركة Share، عشان تفيد بيه غيرك، من هنا 

لو عندك أي إستفسار أو تعليق إكتب لي تحت في التعليقات 

أتمنى لكم دوام الصحة و العافية 

مع السلامة